Proġetti ta’ Manutenzjoni u Konservazzjoni – Il-kwadru tan-Nawfraġju ta’ San Pawl
Matul dawn il-jiem ser jittieħed għall-konservazzjoni u r-restawr ukoll il-kwadru tan-Nawfraġju ta’ San Pawl li għandna fis-Sagristija.
Dan ix-xogħol ser isir mir-restawratriċi Dr Amy Sciberras.
Napprezzaw lil min qed jagħti mill-ħin, mill-ħidma u mill-kontribuzzjonijiet finanzjarji tiegħu, biex inkomplu għaddejjin bil-proġetti ta’ manutenzjoni, anke f’dawn il-jiem iebsin. Inħeġġu lil min jista’ jgħin biex ma joqgħodx lura.
Proġetti ta’ Manutenzjoni u Konservazzjoni – Il-knisja ta’ Santa Marija
Matul dawn il-jiem inġieb l-iscaffolding li tul ix-xahar ta’ Mejju ser jibda jintrama fuq il-lat estern tal-knisja ta’ Santa Marija sabiex jinbeda l-proċess ta’ restawr u konservazzjoni tagħna.
Il-proġett huwa possibbli bil-koperazzjoni sħiħa tal-Kunsill Lokali, permezz tal-iskema ta’ Proġetti ta’ Restawr ta’ Postijiet Storiċi, u ser jitwettaq mill-ħaddiema tad-Dipartiment tar-Restawr.
Proġetti ta’ Manutenzjoni u Konservazzjoni – Il-lanterna tal-koppla tal-Knisja Parrokkjali
Matul dawn il-jiem qed jeħlu f’posthom mill-ġdid it-twieqi tal-lanterna tal-koppla tal-Knisja Parrokkjali li tul is-sena li għaddiet inqalgħu u ngħataw dawra sewwa f’tiswija ta’ ħsarat u manutenzjoni mis-Sur Anthony Abdilla, flimkien ma’ ibnu Edwin, u s-Sur Anthony Busuttil (Ta’ Kaspan).
F’Ottubru 2020, il-kumpanija Recowatt Ltd ta’ Ħaż-Żebbuġ ħadet ħsieb it-twaħħil ta’ solar film mal-ħġieġ biex inaqqas id-dawl u l-UV.
It-tibdil taċ-ċaċċis u t-twaħħil tat-twieqi qed isir mis-Sinjuri Edwin Abdilla, Manwel Dobono, Pawlu Busuttil u Alfred Polidano.
